Чӑваш халӑх поэчӗ Юрий Сементер 85 ҫул тултарнӑ май ӑна тӑван тӑрӑхӗнче, Красноармейски районӗнче, саламланӑ, шупӑр тӑхӑнтартнӑ.
Танӑш ялӗнче ҫуралса ӳснӗ ентешне сума суса вырӑнтисем район центрӗнче ҫӗкленекен культура ҫуртне ун ятне пама йышӑннӑ.
Юрий Сементер хайлавӗсене 20 ытла чӗлхепе куҫарнӑ. Вӑл хӑй те ӑста куҫаруҫӑ май Александр Пушкинӑн, Михаил Лермонтовӑн, Сергей Есенинӑн тата ытти поэтпа ҫыравҫӑн хайлавне чӑвашла куҫарнӑ.
2025 ҫулшӑн Нестер Янкас ячӗллӗ премие тата лауреат ятне Антонина Никонорова тивӗҫнӗ.
Антонина Николаевна – «Трак ен» халӑх фольклор ушкӑнӗн ертӳҫи. Преми лауреачӗ ята ӑна «юрӑ-кӗвӗ тӗнчинче ырми-канми тӑрӑшнӑшӑн, чӑваш юррине халӑх хушшинче анлӑ сарнӑшӑн, 2025 ҫулта пултарулӑх ӗҫӗнче пысӑк ҫитӗнӳсем тунӑшӑн тата ҫуралнӑранпа 50 ҫул ҫитнӗ май» парас тенӗ. Лауреат ятне пама ӑна Красноармейскинчи Тӗп централизациленӗ клуб тытӑмӗ тата Красноармейски тӑрӑхӗнчи культура ӗҫченӗсен профессиллӗ пӗрлешӗвӗ тӑратнӑ.
Ӗнер, кӑрлач уйӑхӗн 2-мӗшӗнче, чӑваш халӑх поэчӗ Юрий Сементер 85 ҫул тултарнӑ.
Вӑл Красноармейски районӗнче ҫуралнӑ. Кун-ҫулне литературӑпа тӳрех ҫыхӑнтарман. Малтан Шупашкарти музыка училищине вӗренме кӗме тӑнӑ, анчах май килмен. Ҫавӑн хыҫҫӑн тӑван тӑрӑхри колхозра, унтан культура ҫуртӗнче тӑрӑшнӑ. Хӑй вара ҫырма яланах юратнӑ. Ҫавӑнпа хаҫатсемпе ҫыхӑну тытнӑ.
Кӑштахран ӑна шӑпа Ҫӗрпӳри ВЛКСМ райкомне илсе ҫитернӗ. 1966 ҫулхи кӑрлач уйӑхӗнче «Октябрь ҫулӗ» райхаҫатра ӗҫлеме тытӑннӑ. Каярах Ҫӗрпӳри культурӑпа ҫутӗҫ училищине, унтан Чӑваш патшалӑх университетне вӗренме кӗнӗ. Чӑваш кӗнеке издательствинче, «Ялав» журналта ӗҫленӗ.
Нестер Янкас ячӗллӗ пӗрлӗх 2025 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. ҫакӑн пек пӗлтернӗ пӗрлӗх ертӳҫин ҫумӗ Виталий Михайлов халӑх тетелӗнчи хӑйӗн страницинче.
Ӗҫсене 2026 ҫулхи нарӑс уйӑхӗн 20-мӗшӗччен йышӑнӗҫ. Сӑмах май каласан, Нестер Янкас поэт ҫуралнӑранпа 117 ҫул ҫитет. Уяв ячӗпе Красноармейски Культура ҫуртӗнче лауреатсен пысӑк концерчӗ пулӗ тата ҫӗнӗ лауреатсене чыслӗҫ.
«Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх та пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти пултарулӑх ӗҫӗсемпе савӑнтарнӑ ентешӗмӗрсем хутшӑнасса шанатпӑр эпир», — тесе хыпарланӑ эпир маларах Виталий Михайлов.
Республикӑри «Манӑн ФАП – чи лайӑххи» конкурса пӗтӗмлетнӗ. Чи лайӑх виҫӗ фельдшерпа акушер пунктне палӑртнӑ.
Ку йыша Муркаш округӗнчи Хорнуй ялӗнчи ФАП, Красноармейски округӗнчи Именкассинчи ФАП тата Патӑрьел округӗнчи Ҫӗнӗ Катек ялӗнчи ФАП лекнӗ.
Ҫӗнӗ Катекри ФАП тӗслӗхлӗ пулнине те палӑртнӑ. Унти опытне республикӑри 21 фельдшерпа акушер пункчӗ тӗслӗх вырӑнне хурса ӗҫлеҫҫӗ.
Красноармейски округӗнчи Пикшик ялӗнче пурӑнакан Ивановсем «Ашшӗ-амӑшӗн мухтавӗ» орден медальне тивӗҫнӗ. Хушӑва РФ Президенчӗ Владимир Путин алӑ пуснӑ.
Наталия Владимировнӑпа Владимир Николаевич 30 ҫул пӗрле пурӑнаҫҫӗ. Вӗсем 5 ача ҫуратнӑ, вӗсене ура ҫине тӑратаҫҫӗ. Наталия Владимировна вырӑнти лавккара сутуҫӑра ӗҫлет. Владимир Николаевич «Кетра» заводра аппаратчикра тӑрӑшать. Унӑн алли ылтӑн: кил хуҫалӑхӗнче хуралтӑ таврашӗсене хӑйех ҫӗкленӗ. Ачисем те маттур: аслисем ӗҫлеҫҫӗ, кӗҫӗннисем шкулта вӗренеҫҫӗ.
Вӑрманта ҫӳп-ҫап купине тупнӑ. Ҫак киревсӗр ӗҫе кам тунине шкул дневникӗ палӑртма пулӑшнӑ. Вӑрман инспекторӗсем ҫӳп-ҫап купине Сӑнав лесничествин Сурӑм участокӗнче асӑрханӑ.
Унта темӗн те пулнӑ. Инспекторсен куҫӗ тӗлне шкул дневникӗ лекнӗ. Ӑна уҫса пӑхсан хуҫи Красноармейски округӗнчи пӗр шкулта вӗреннине пӗлнӗ. Специалистсем вӑл ӑҫта пурӑннине, ашшӗ-амӑшӗн ятне-шывне палӑртнӑ. Вӗсем патне киле кайса протокол ҫырнӑ.
Халӗ йӗрке пӑсакансене 1 пин тенкӗ таран штраф тӳлеттерме пултараҫҫӗ Унсӑр пуҫне вӑрман фондне сиен кӳнӗшӗн 4500 тенкӗ штраф хураҫҫӗ.
Красноармейски округӗнчи Алманч ялӗнчи Матвеевсен ылтӑн туйӗ ҫитнӗ. Ҫак ятпа вӗсене ЗАГС ӗҫченӗсем саламланӑ.
Кил ӑшшин управҫи Искра Афанасьевна Шупашкарти 15-мӗш ача пахчи-яслире нумай ҫул тӑрӑшнӑ. Владимир Максимович Шалти ӗҫсен министерствинче аслӑ следователь пулнӑ, подполковник званийӗ таран ҫитнӗ.
Ҫемье телейӗн вӑрттӑнлӑхне уҫнӑ вӗсем: пӗр-пӗрне хисеплемелле, пулӑшса пымалла.
Красноармейски округӗнче ҫӗрле 40-ри хӗрарӑм ҫул варрипе утнӑ чухне машина айне пулнӑ. Вӑл вилмеллех аманнӑ.
Ку инкек авӑн уйӑхӗн 20-мӗшӗнче 23:30 сехетре «Кетра» савут патӗнче пулнӑ. «Киа» машинӑпа пынӑ 23-ри водитель ӑна асӑрхаса ӗлкӗреймен, ун ҫине пырса кӗнӗ.
Хӗрарӑм Красноармейски салинче пурӑннӑ. Ҫакӑ паллӑ: вӑл ҫӗрле кӳршӗ ялтан хӗр тусӗ патӗнчен таврӑннӑ.
Инкек умӗн кӑшт маларах иртсе кайнӑ машина регистраторӗнчен ҫакӑ паллӑ: водитель тӗлӗнмелле майпа хӗрарӑм ҫине пырса кӗмен, ӑна ҫул ҫинчен ҫавӑтса тухас тесе чарӑннӑ. Анчах... кая юлнӑ. Ӑна хыҫра пынӑ машина ҫапса кайнӑ.
Чӑваш Республикин культурӑн тава тивӗҫлӗ ӗҫченӗ Петӗр Яккусен (Петр Яковлевич Яковлев) пурӑннӑ пулсан кӑҫалхи ҫурла уйӑхӗн 26-мӗшӗнче 75 ҫул тултаратчӗ. Иртнӗ уйӑхӑн вӗҫӗнче чӑваш ҫыравҫисен пӗр ушкӑнӗ – Юрий Исаев, Владимир Степанов тата Олег Кульев – поэтӑн тӑван ялӗнче, Красноармейски тарӑхӗнчм Упаҫырми ялӗнче, пулнӑ. Кун пирки Чӑваш кӗнеке издательстви халӑх тетелӗнчи хӑйӗн пабликӗнче пӗлтернӗ.
Калем ӑстисем Петр Яковлевичӑн арӑмӗпе Светлана Зиновьевнӑпа курса калаҫнӑ, унтан ҫӑва ҫине кайса килсе поэта асӑннӑ.
+9.3 °C